Tërheqja ndaj gjinisë së kundërt nuk është mëkat; është si uria në Ramazan—diçka plotësisht natyrale. Islami nuk e ndalon dashurinë dhe as nuk e nënvlerëson dëshirat, duke na kërkuar t’i shtypim ato. Në fakt, feja jonë i pranon dhe na mëson si t’i disiplinojmë këto dëshira. Është kultura ajo që e ka bërë të sikletshme të flasim dhe të kërkojmë këshilla për çështje intime.
Musa—Historia e Tij e nga nje prespektive tjeter
Kush nuk e ka lexuar historinë e profetit Musa? Torturat e Faraonit ndaj Beni Israilëve, ndarja e detit të kuq, fundosja e Faraonit. Por le të kthehemi pak mbrapa, sepse kemi edhe mësime të tjera nga historia e Musait. Allahu nuk përmend një histori në Kuran veçse ka një mesazh për brezat që vijnë.
Allahu përmend me detaje si u takua Musa me bashkëshorten e tij, ndërveprimin mes tyre dhe mënyrën se si përfunduan të martuar. Vetëm nga kjo histori kemi kaq shumë mësime: marrëdhëniet me gjininë e kundërt, martesa, besimi në Allah—dhe lista vazhdon.
Shpesh themi se Islami është i mërzitshëm, se Kurani vetëm na thotë çfarë është e drejtë dhe çfarë është e gabuar. Kjo është një nënvlerësim i madh. Kurani është një manual jete që, po ta lexosh drejt, mund ta transformojë plotësisht jetën.
Media moderne na ka kthyer në robotë që jetojnë në fantazi: princë mbi kuaj të bardhë, gra të përsosura, romanca të sajuara. Por nëse do t’i hidhnim sytë tek Kurani dhe Suneti, do të gjenim histori të dashurisë më të bukura se çdo roman. Nuk na duhen novela romantike kur vetë Allahu na ka treguar modele të vërteta.
Musa, Princi i Ri i Egjiptit
Musa u rrit në luksin e shtëpisë mbretërore të Faraonit. Njerëzit e shikonin si të pashëm, të fortë e të shëndetshëm. Kishte fytyrë të ndritshme, sy të shkëlqyeshëm, trup të fortë. Princ me origjinë mbretërore, i rritur nga Faraoni dhe Mbretëresha Asije, kishte çdo rehati dhe liri.
Njëkohësisht kishte mençuri të jashtëzakonshme. Por njerëzit nuk e dinin se këto ishin shenja të profetësisë së tij dhe se një ditë do të sillte revolucion kundër tiranisë së Faraonit. Pavarësisht rehatisë, Musa ishte i trazuar shpirtërisht duke parë padrejtësitë e Faraonit. I varfrit e të shtypurit gradualisht e kuptuan se Musa ishte i mëshirshëm dhe i gatshëm t’i ndihmonte.
Pra: I pashëm, i pasur dhe vullnetar për të ndihmuar. Motra, mendoj se lista kryesore u plotësua, apo jo?
Dilema që i Ndryshoi Jetën Musait
Pas konfliktit që pati në Egjipt, u detyrua të largohej. Udhëtoi për javë të tëra dhe mbërriti në Madyan. Ishte i lodhur, me rroba të pluhurosura, pa ushqim. Aty pa një pus ku burrat po ujisnin kopetë. Aty pranë vuri re dy gra që prisnin. Kopenë e tyre e mbanin larg, sepse burrat nuk i linin të afroheshin.
Megjithëse i lodhur, Musa vendosi t’i ndihmonte. Ai nuk ishte njeri që qëndronte pa bërë asgjë. I pastër nga zemra, i drejtë dhe i ndjeshëm, u afrua dhe ua ujiti bagëtitë. Ato e falënderuan, ndërsa Musa u kthye nën hijen e një peme. Ishte i huaj, i vetmuar, pa punë, pa shtëpi, i rritur në luks, e tani pa asgjë. Megjithatë nuk kërkoi asgjë në këmbim—as kafe, as darkë, as “mund të takohemi sërish”.
Duaja Shembullore e Musait
Musa iu drejtua Allahut me këtë duasë të sinqertë:
“Zot! Unë kam nevojë për çdo të mirë që Ti më dërgon.”
(Al-Qasas, 28:24)
Dijetarët thonë se vajzat e dëgjuan duanë e tij. Kjo duá i solli Musait punë, shtëpi dhe një familje—të gjitha njëherësh. Kur nuk të mbetet askush veç Allahut, atëherë e gjen se Ai të mjafton.
Momenti Kur Gjithçka Ndryshon
Kur vajzat u kthyen shpejt në shtëpi, babai i tyre u habit. Pas rrëfimit të tyre, ai dërgon njërën nga vajzat ta thërrasë Musan.
Ajo i afrohet me turp dhe modestinë e një gruaje të ndershme, duke i thënë:
“Babai im të fton të të shpërblejë për ndihmën që na dhe.”
Sërish sjellje e pastër dhe e kujdesshme.
“Ulja e Shikimit” e Musait
Musa e pranoi ftesën. Por i kërkoi vajzës të ecte pas tij, ndërsa ajo t’i tregonte rrugën duke hedhur gurëz në drejtimet që duhej të merrte—që ai të mos e shihte duke ecur para tij.
Ky ishte një shembull i modestisë së lartë të Musait. Ai, një princ që mund të kishte gra që i viheshin para, këtu e ul shikimin për hir të Allahut. Një model për çdo burrë mysliman.
Takimi me Babain e Vajzës
Musa i shpjegoi historinë babait të saj. Ai e qetësoi duke i thënë se ishte i sigurt në këtë vend, larg tiranisë së Faraonit.
Njëra nga vajzat i thotë babait:
“O babai im! Merre në punë, sepse më i miri që mund të marrësh në punë është ai që është i fortë dhe i besueshëm.”
Ajo e njihte Musan: e kishte parë forcën e tij dhe ndershmërinë e tij.
Familja e Re e Musait në Madjan.
Babai i vajzave i thotë Musait:
“Dua të të jap për grua njërën nga vajzat e mia, me kusht që të punosh për mua 8 vjet. Nëse i plotëson 10 vjet, është prej bamirësisë sate.”
Musa i plotësoi 10 vitet—sepse profetët e mbajnë fjalën në mënyrën më të mirë.
Pas kësaj periudhe, Allahu e shpalli Musan profet dhe e urdhëroi të kthehej në Egjipt për t’u përballur me Faraonin.
Çfarë Mësojmë nga Historia e Musait
Një nga mësimet më të mëdha është se babai e martoi vajzën me Musan vetëm pasi u sigurua për devotshmërinë dhe karakterin e tij—jo për statusin e tij financiar. Kështu duhet të jetë edhe sot baza e martesës.
Profeti ﷺ ka thënë:
“Nëse te vajza juaj kërkon dorën një burrë me fe dhe karakter të mirë, martoje atë me të. Në të kundërtën do të ketë shkatërrim dhe korrupsion në tokë.”
Fatkeqësisht sot shumë prindër i shohin vetëm të ardhurat dhe jo moralin. Por furnizuesi i vërtetë është Allah–u, Ar-Razzak.
Takimi i Tyre – Një Histori Dashurie e Shkruar nga Allahu
Historia e Musait dhe bashkëshortes së tij është shembulli i një dashurie të pastër dhe të lejuar, pa drama, pa romanca të sajuara, pa biseda të pafundme. Një histori e drejtë dhe e mbrojtur nga Allahu.
Njerëzit thonë se dashuria dhemb. Unë them: nëse është dashuri e vërtetë e shkruar nga Allahu, ajo nuk dhemb kurrë, sepse dashuria është dhuratë. Nëse dhemb, është nga Shejtani.
Edhe nëse ju pëlqen dikush, ndiqni rrugën e duhur. Profeti ﷺ ka thënë:
“Nuk ka gjë më të mirë për dy njerëz që e duan njëri-tjetrin sesa martesa.”
Dhe mos harroni:
50,000 vjet para se qielli të takohej me detin, Allahu e ka shkruar emrin tënd pranë atij/asaj që të është caktuar.
Prisni kohën e duhur.
