Shkruar nga Zakeeya Ali
Rritja e fëmijëve adoleshentë mund të jetë një përvojë prindërimi e dhimbshme – auç! Ju dëshironi një marrëdhënie të ngushtë me ta, por ata e bëjnë aq të vështirë që t’u afroheni kur shfaqin mosrespekt dhe pabindje ndaj jush. Grindjet e vazhdueshme bëjnë që çarja në marrëdhënien tuaj me djalin ose vajzën tuaj adoleshente të zgjerohet çdo ditë.
I mbani mend ditët e vjetra të mira kur fëmija juaj ishte i vogël dhe drejtohej te ju për çdo gjë? Ishte aq e thjeshtë ta disiplinoje atë duke përdorur shpërblime dhe pasoja, dhe akoma më e lehtë ta falje sepse ishte aq i lezetshëm!
Pastaj, ndërsa fëmija juaj rritet në një adoleshent, ai duket se dëshiron të bëjë ekzaktësisht të kundërtën e asaj që thoni ju. Ai debaton për çdo gjë dhe kujdeset më shumë për të kontaktuar me miqtë e tij, për të luajtur një video-lojë ose për të qëndruar në telefonin e tij. Nëse ju madje përpiqeni të hulumtoni në jetën e tij, shpesh ndesheni me përbuzje dhe mosinteresim dhe merrni përgjigje të tilla si: “Asgjë” ose “Nuk e di”.
Pra, si të komunikoni me adoleshentët tuaj pa i bërë ata të ndjehen sikur po u shkelni në kallo?
Këshilla më e madhe e prindërimit për rritjen e adoleshentëve është të përdorni pafundësi dashurie dhe të kaloni kohë cilësore me ta.
Si është e mundur kjo? Lexoni pesë mënyra për të përmirësuar marrëdhënien tuaj me djalin ose vajzën tuaj adoleshente.
1. Tregojini dashuri adoleshentit tuaj
Tregojini adoleshentit tuaj se sa shumë e doni përmes veprimeve tuaja. T’i jepni përqafime, t’i shpupurisni flokët dhe t’i buzëqeshni janë shpesh mënyra të shkëlqyera për të filluar. E di që është e vështirë ndonjëherë kur gjithçka që dëshironi të bëni është ta kapni nga këmisha dhe t’i tundni kokën që të mbushet me mend. Megjithatë, mbani mend se kjo është një fazë e sikletshme në jetët e të dyve dhe do të kalojë shpejt. Është thelbësore të zbuloni se çfarë depërton te adoleshenti juaj në mënyrë që të përdorni atë që është më efektive. Disa ide do të përfshinin:
- Tregojini adoleshentit tuaj afërsisht shpesh.
- Jepini adoleshentit tuaj një dhuratë të menduar ndonjëherë.
- Gatuni vaktin ose ëmbëlsirën e preferuar të adoleshentit tuaj dhe thoni që e bëtë kryesisht për të.
- Thjesht shprehni inkurajim dhe lëvdata për gjërat që ai bën.
2. Jepini kohë adoleshentit tuaj
Një adoleshent e njeh dashurinë si kohën që kaloni me të dhe me familjen si një e tërë. Mund të duket se marrja pjesë në aktivitetet familjare nuk është ajo që ajo dëshiron të bëjë, por ajo kohë e kaluar së bashku do ta ndihmojë atë të qëndrojë e lidhur me ju dhe pjesën tjetër të shtëpisë. Ajo ka nevojë për këtë kohë familjare për t’u zhvilluar mirë, por nuk e di këtë vetë.
Kalimi i kohës vetëm-për-vetëm me adoleshentin tuaj është një tjetër mënyrë e shkëlqyer për t’u lidhur. Nxirreni jashtë për të bërë diçka argëtuese së bashku, shkoni për kafe, ose në restorantin e saj të preferuar për drekë. Një adoleshent zakonisht do të dëshironte të:
- Shkonte në një librari.
- Shkonte për një shëtitje në natyrë (hike).
- Shkonte për një film.
- Shkonte për shopping.
- Shkonte për një ditë në spa.
- Merrte një kupë akullore (sundae) ose një pije të ngrirë (slushy).
- Bënte një prerje të re flokësh.
- Rregullonte thonjtë etj.
E di që kjo mund të duket sikur po e llastoni kur ajo nuk e meriton, por caktimi i kësaj “kohe për adoleshentin” do t’i japë asaj diçka për të pritur me padurim dhe do të formoni kujtime të mira së bashku. Plus, ju po lidheni me të në mënyrë delikate në territorin e saj, kështu që ajo do t’u drejtohet më pak miqve të saj.
Kyçi është të zgjidhni diçka që adoleshenti juaj do ta shijojë sipas personalitetit të tij. Ka gjithashtu një sërë opsionesh nëse buxheti juaj është i shtrënguar, kështu që nuk keni nevojë të shpenzoni shumë për t’u lidhur.
3. Dëgjojeni adoleshentin tuaj
Lëreni adoleshentin tuaj të dijë se jeni gjithmonë i gatshëm ta dëgjoni atë. Kur thoni fraza si, “Jam këtu për ty” ose “Do të dëshiroja shumë të dëgjoja për ditën tënde”, ju po i bëni të dijë se e mbështetni. Mos ushtroni asnjë presion mbi të për të folur dhe për t’iu përgjigjur pyetjeve të shumta hulumtuese. Bëhuni një dëgjues i mirë dhe lejoni adoleshentin tuaj të zgjidhë problemet. Me fjalë të tjera, nëse adoleshenti juaj duket i shqetësuar, bëjini një pyetje të thjeshtë dhe prisni që ai të përgjigjet. Tregojini se po e dëgjoni, por mos ndërhyni me zgjidhje. Kur bëni pyetje të tjera rastësore, ai do të punojë për ta zgjidhur problemin vetë. Më pas, ju mund të shtoni në mënyrë delikate këshillën tuaj te zgjidhja e tij, që ai të mos ndjehet sikur po i thoni se çfarë të bëjë.
Nëse adoleshenti juaj ndjen se po e “shtypni” me këshilla dhe ligjërata, veçanërisht pasi ai po hapet, ai mund të fillojë t’ju shpërfillë. E di që kjo tenton të jetë e vështirë për t’u kontrolluar kur instinkti juaj si prind po ulëret ndryshe, por të qenit delikat dhe të folurit kur koha është e duhur do të sjellë rezultate më të mira kur komunikoni me adoleshentin tuaj.
4. Tregohuni real me adoleshentin tuaj
Ndërsa përpiqeni të kuptoni adoleshentin tuaj, lëreni atë t’ju kuptojë juve. Ajo do të ndjejë se mund të lidhet më shumë me ju kur të kuptojë se keni pasur ndjenja dhe konfuzion të ngjashëm në moshën e saj. Kur ndani disa histori adoleshence përkatëse ose ngjarje nga e kaluara juaj, ju po i tregoni asaj se si keni qenë përpara se të bëheshit prind. Kjo ndershmëri do ta bëjë adoleshentin tuaj të ndjehet më rehat duke ndarë historitë e saj me ju, sepse ajo do të mendojë se kjo është normale dhe nuk do të shkaktojë mosmiratimin tuaj.
Akoma më mirë, pranoni gabimet e të kaluarës suaj dhe tregoni përvojat e jetës që keni fituar prej tyre. T’i tregoni adoleshentit tuaj se jeni njerëzor dhe keni dobësi gjithashtu, do ta bëjë atë t’ju admirojë si një person që ka guximin të pranojë gabimet. Ajo gjithashtu do të ndjehet më rehat duke e ditur që as ju nuk jeni perfektë dhe se gabimet tuaja ju bënë më të mençur.
5. Bëhuni shembull për adoleshentin tuaj
Adoleshentët nuk i mendojnë prindërit e tyre si modele (role models) sepse besojnë se prindërit e tyre janë shumë gjykues dhe të pashqetësuar për jetët e tyre të reja. Adoleshenti juaj do të vendosë një vlerë më të lartë te “të qenit real” (siç u përmend te pika #4), edhe nëse ai nuk jeton gjithmonë në atë mënyrë. Mbani mend se adoleshenti juaj po vëzhgon çdo gjë që bëni dhe thoni. Ai do të vëzhgojë se si i trajtoni situatat etike dhe si i trajtoni njerëzit e tjerë. Adoleshentët vëzhgojnë për të parë nëse po bëni atë që thoni se ata duhet të bëjnë.
Të qenit shembull mund të jetë hapi më i vështirë për një prind. Ne dëshirojmë që fëmija ynë të jetë më i mirë se ne, megjithatë harrojmë se nuk mund t’i kërkojmë fëmijës sonë të bëjë atë që ne nuk mundemi ta bëjmë. Kjo është arsyeja pse ia vlen të jeni të respektueshëm ndaj adoleshentit tuaj dhe të mos jeni nënçmues kur i drejtoheni atij, madje edhe kur nuk jeni dakord.
Është e mundur të keni një marrëdhënie të shëndetshme me adoleshentin tuaj, mos besoni të kundërtën ose të mendoni se adoleshenti juaj është shumë egoist për t’u shqetësuar. Ajo shqetësohet shumë më tepër nga sa mendoni ju, pasi është në një fazë jashtëzakonisht të ndjeshme në zhvillimin e saj. Ajo që i thoni negativisht adoleshentit tuaj do të presë thellë, edhe pse ajo nuk do ta pranojë atë.
Punoni në forcimin e marrëdhënies tuaj me adoleshentin tuaj dhe mbajeni derën e komunikimit të hapur gjerësisht. Vazhdoni t’i tregoni asaj dashurinë tuaj, edhe kur ajo largohet.
Së fundmi, vazhdoni të lini mënjanë kohë për të kaluar me të vetëm dhe si familje. Me kohën, faza e adoleshencës do të kalojë inshallah, dhe ju nuk do të mbeteni me ndjenjën se si prind nuk u përpoqët ose që dështuat sepse u dorëzuat shumë shpejt.
Allahu SWT gjithashtu na kujton se fëmijët tanë janë një sprovë për ne, dhe ne do të marrim shpërblimin tonë një ditë.
“Pasuria juaj dhe fëmijët tuaj janë vetëm një sprovë, ndërsa te Zoti, tek Ai është shpërblimi i madh (Xheneti).” (Kuran 64:15)
